កាន់តែពិសេសហើយពេលនេះ! កាណូតដឹកអ្នកដំណើរតម្លៃ ២០ម៉ឺនដុល្លារបើកផ្លូវការមុនចូលឆ្នាំខ្មែរ គ្រោងឲ្យជិះ Free
ការដឹកជញ្ជូនអ្នកដំណើរតាមផ្លូវទឹក ពីព្រែកព្នៅ-តាខ្មៅ នឹងបើកឲ្យដំណើរការ នៅថ្ងៃទី៦ ខែមេសា ឆ្នាំ២០១៨។ នេះបើតាមឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន។
ក្នុងពេលអញ្ជើញពិនិត្យការដ្ឋានសាងសង់កំពង់ផែកាណូតដឹកជញ្ជូនអ្នកដំណើរ នៅទីលានប្រជាធិបតេយ្យថ្មី នៅឃ្លាំងសាំងឫស្សីកែវ នាព្រឹកថ្ងៃទី១០ ខែមីនានេះ ឯកឧត្តម ស៊ុន ចាន់ថុល បានឲ្យដឹងថា ក្រសួងបានកុម្ម៉ង់ទិញកាណូតថ្មី ២ គ្រឿងពីប្រទេសវៀតណាម។ ក្នុងនោះ ១គ្រឿង តម្លៃជិត ២០ម៉ឺនដុល្លារ។
លោករដ្ឋមន្ត្រីបន្តថា កាណូតថ្មី មានចំណុះ ផ្ទុកអ្នកដំណើរ ៤៨នាក់ ដោយបំពាក់ម៉ាស៊ីនត្រជាក់។ រីឯកាណូតចាស់របស់ក្រសួង អាចផ្ទុកមនុស្ស ៦០ នាក់ ក្នុង ១គ្រឿង។ ចំពោះការដាក់ឲ្យដំណើរការដោយឥតគិតថ្លៃនោះ លោកទេសរដ្ឋមន្ត្រី ស៊ុន ចាន់ថុល បញ្ជាក់ថា រដ្ឋាភិបាលនឹងពិចារណា នៅពេលបើកដំណើរការដំបូង នឹងអនុញ្ញាតឲ្យជិះ Free ប៉ុន្តែមិនទាន់កំណត់រយៈពេលនៅឡើយ។
កាណូត ១គ្រឿង នឹងផ្ទេរមកឲ្យកម្ពុជា នៅថ្ងៃទី៣០ ខែមីនា នៅក្អមសំណរ ហើយ ១គ្រឿងទៀត នឹងប្រគល់ឲ្យកម្ពុជា នៅខែមេសា។ ក្នុងនោះ កម្ពុជាក៏មាន កាណូតចាស់ ២គ្រឿង ដែលជួសជុលលាបថ្នាំ ដើម្បីឲ្យដាក់ដំណើរការដឹកជញ្ជូនអ្នកដំណើរនេះ។ ដូច្នេះនៅថ្ងៃទី៦ ខែមេសា ឆ្នាំ២០១៨ យ៉ាងហោចណាស់ មានកាណូត ៣ គ្រឿង ដើម្បីដឹកជញ្ជូនអ្នកដំណើរពីភ្នំពេញ នៅចំណុចព្រែកព្នៅ ទៅតាខ្មៅ ខេត្តកណ្តាល៕
Post a Comment