ពេលនេះ ក្រសួងការបរទេសរុស្ស៊ី លេងមែនទែនហើយ ! បណ្ដេញមន្ត្រីទូតចំនួន ២៣ប្រទេស ក្នុងពេលតែមួយ
កាលពីថ្ងៃសុក្រ ទី៣០ ខែមីនា ឆ្នាំ២០១៨ក្រសួងការបរទេសរុស្ស៊ី បានប្រកាសជូនដំណឹងទៅកាន់មន្ត្រីការទូតចំនួន ២៣ប្រទេស ឲ្យវេចបង្វេចចេញពីប្រទេសរុស្ស៊ីភ្លាមៗ ក្រោយរដ្ឋាភិបាលប្រទេសទាំងនោះ បានបណ្ដេញមន្ត្រីទូតរុស្ស៊ី ចេញមុន កាលពីពេលថ្មីៗកន្លងទៅ។
ប្រទេសទាំង ២៣រួមមាន៖ អូស្ត្រាលី អាល់បានី អាល្លឺម៉ង់ ដាណឺម៉ាក អៀរឡង់ អេស្ប៉ាញ អ៊ីតាលី កាណាដា ឡាតវី លីទុយអានី ម៉ាសេដូនី ម៉ុលដូវ៉ា ហុល្លង់ ន័រវែស ប៉ូឡូញ រ៉ូម៉ានី អ៊ុយក្រែន ហ្វាំងឡង់ បារាំង ក្រូអាត ឆេក ស៊ុយអែត និង អេស្តូនី។ មន្ត្រីទាំងអស់ រួមទាំងឯកអគ្គរដ្ឋទូតនិមួយៗ ដែលត្រូវបានបណ្ដេញ មានចំនួនសរុប ៥៩រូប។
ក្រសួងការបរទេសរុស្ស៊ី បានព្រមានថា ប្រសិនបើប្រទេសបែលហ្ស៊ិក ហុងគ្រី ហ្សកហ្ស៊ី និង ម៉ុងតេណេក្រូ ហ៊ានតែចូលរួមជាមួយបណ្ដាប្រទេសខាងលើ ខ្លួននឹងបណ្ដេញមន្ត្រីការទូតទាំង៤ប្រទេសនេះ ថែមទៀត។
ជាមួយគ្នានេះ រុស្ស៊ី បានកោះហៅឯកអគ្គរាជទូតអង់គ្លេស ដើម្បីចរចា អំពីការបន្ធូរបន្ថយភាពតានតឹងនៃទំនាក់ទំនងការទូតរវាងប្រទេសទាំងពីរ ឲ្យបានប្រសើរក្នុងរយៈពេល១ខែ។
សូមបញ្ជាក់ថា ថ្មីៗនេះ រដ្ឋាភិបាលរុស្ស៊ី ក៏បានសម្រេចបណ្ដេញទូតអាមេរិកចំនួន ៦០នាក់ចេញពីប្រទេស ហើយបានបិទស្ថានកុងស៊ុលនៅក្រុង St Petersburg ផងដែរ។ ការបណ្ដេញនេះ ធ្វើឡើងក្រោយពីអាមេរិក រួមគ្នានឹងបណ្ដាប្រទេសនានា បណ្ដេញមន្ត្រីការទូតរុស្ស៊ី ១៤០នាក់ ជុំវិញរឿងបំពុលភ្នាក់ងារចារកម្មនៅអង់គ្លេស៕
Post a Comment