អូរសោម ជង្រុកសម្បត្តិធម្មជាតិមហាសាល ល្អបំផុតសម្រាប់អ្នកចូលចិត្ត Adventure
សហគមន៍ទេសចរណ៍អូរសោម នៅតំបន់ជួរភ្នំក្រវាញ ខេត្តពោធិ៍សាត់ ជាទីប្រជុំដោយសម្បត្តិធម្មជាតិដ៏មហាសាល កម្រមានអ្នកទៅដល់បំផុត។ លោក គាំ វិទូ ជាអ្នកខេត្តសៀមរាប ចូលចិត្តធ្វើការផ្សងព្រេងទៅតំបន់ធម្មជាតិនានា ក្នុងប្រទេសកម្ពុជា បានទៅដល់សហគមន៍ទេសចរណ៍អូរសោម និងបានប្រទះឃើញទស្សនីយភាពដ៏អស្ចារ្យជាច្រើនមិននឹកស្មានដល់នៅទីនោះ។
អ្នកខេត្តសៀមរាប ចូលចិត្តផ្ដិតការថតរូបនេះ ប្រាប់ថា ក្នុងសហគមន៍ទេសចរណ៍អូរសោម ភ្ញៀវទេសចរ អាចសម្រាកផ្ទះស្នាក់របស់អ្នកស្រុក មានអាហារប្រចាំតំបន់ប្លែកៗ និងមានមគ្គុទ្ទេសក៍ នាំដើរកម្សាន្តក្នុងសហគមន៍ទៅកាន់តំបន់ប្លែកៗជាច្រើន។ ក្នុងមានដូចជាទឹកធ្លាក់រហូតទៅដល់៧កន្លែងផ្សេងគ្នា មានបឹងដ៏ធំ ទស្សនាក្រពើព្រៃ និងតំបន់វាលវែងគ្របដណ្ដប់ដោយធម្មជាតិដ៏ស្រស់បំព្រង។
រយៈពេល២ថ្ងៃដែល វិទូ បានទៅដល់សហគមន៍ទេសចរណ៍អូរសោម កាលពីដើមខែមេសា បានរៀបរាប់ប្រាប់ Sabay ថា លោកបានទៅដល់ទឹកធ្លាក់ ឆាយរការ មានទេសភាពស្អាតខ្លាំង ហើយអ្នកស្រុកប្រាប់ថាកម្រមានអ្នកទៅដល់ណាស់។ លោក និងមិត្តភក្ដិ បានជួលម៉ូតូជិះកាត់ផ្លូវលំតូចៗ មានចម្ការចេករបស់អ្នកស្រុក ត្រូវឆ្លងកាត់ផ្លូវឡើងចំណោត ចុះចំណោត និងឧបសគ្គជាច្រើន រហូតទៅដល់ទឹកធ្លាក់ឆាយរការ។ ប៉ុន្តែមិនធ្វើឲ្យការផ្សងព្រេងនោះឥតប្រយោជន៍ឡើយ ព្រោះភាពអស្ចារ្យនៃធម្មជាតិនៅទីនោះ បានធ្វើឲ្យមានភាពហត់នឿយធូរស្បើយមួយរំពេច។
ក្រៅពីទៅដល់ទឹកធ្លាក់ឆាយរការ វិទូ ក៏បានទៅដល់ទឹកធ្លាក់មួយកន្លែងទៀតមានឈ្មោះថា ឆាយប្រុយ មានចម្ងាយមិនឆ្ងាយប៉ុន្មានពីទីប្រជុំជនអូរសោមឡើយ។ វិទូ ប្រាប់ថា បើធ្វើដំណើរពីកោះកុងមកខេត្តពោធិ៍សាត់ តាមជួរភ្នំក្រវាញ អាចឆៀងចូលតំបន់ទឹកធ្លាក់នេះយ៉ាងងាយស្រួល តែបើយើងមកពីខេត្តពោធិ៍សាត់វិញ ត្រូវធ្វើដំណើរហួសទីប្រជុំជនអូរសោម ប្រមាណជិត៣០គីឡូម៉ែត្រទៀតទើបដល់។
សហគមន៍ទេសចរណ៍អូរសោម ស្ថិតនៅឃុំអូរសោម ស្រុកវាលវែង ខេត្តពោធិ៍សាត់ មានចម្ងាយប្រមាណ ១៥៣គីឡូម៉ែត្រ ពីទីរួមខេត្ត៕
Post a Comment