ធ្លាក់លិខិតទទួលស្គាល់ លោក អ៊ិន សុភិន ក្លាយជាអនុប្រធានសមាគមភាពយន្តកម្ពុជា

(ភ្នំពេញ)៖ ម្ចាស់ផលិតកម្មមហាហង្ស និងជាផលិករដ៏ល្បីឈ្មោះក្នុងពិភពសិល្បៈ គឺ លោក អ៊ិន សុភិន ដោយទស្សនិកជនភាគច្រើនតែងតែចាប់អារម្មណ៍ និងគាំទ្ររាល់ស្នាដៃផលិតរបស់លោកនោះ ថ្មីៗនេះលោក បានទទួលនូវភារកិច្ចដ៏ចម្បងមួយ ដោយត្រូវបានគណៈកម្មការភាពយន្ត បានធ្វើការជ្រើសរើសលោក ធ្វើជាអនុប្រធានសមាគមភាពយន្តកម្ពុជា ដោយទទួលស្គាល់ជាផ្លូវការពីក្រសួងមហាផ្ទៃ បន្ទាប់ពីលទ្ធិផលនៃបោះឆ្នោះ បានចេញជាយូរមកនោះ។ ជាមួយគ្នានេះ គឺលោក ឆាយ បូរ៉ា មានតួនាទីជាប្រធានសមាគម និងអគ្គលេខាធិកា១រូប រួមទាំង សមាជិក២ រូបទៀត ដែលដើរតួនាទីយ៉ាងសំខាន់ ក្នុងការចម្លងនាវា វិស័យខ្សែភាពយន្ត ការផលិតកុននៅកម្ពុជា ឱ្យកាន់តែរីកចម្រើនជាបន្តបន្ទាប់ ទាំងក្នុងស្រុក និងក្រៅស្រុក។

ជាការកត់សម្គាល់ បើយោងតាមលិខិតផ្លូវការ ដែលបានចេញដោយក្រសួងមហាផ្ទៃ នៅថ្ងៃទី ២១ ខែឧសភា ឆ្នាំ២០១៨ បានប្រកាសទទួលស្គាល់ លោក អ៊ិន សុភិន ធ្វើជាអនុប្រធានសមាគមភាពយន្តកម្ពុជា និងថ្នាក់ដឹកនាំសមាគម ក្នុងអណត្តិថ្មី ចំនួន៤រូបផ្សេងទៀត ឱ្យបន្ដដឹកនាំសមាគមមួយនេះដោយស្របច្បាប់ និងពង្រឹងលើវិស័យផលិតកុន ក៏ដូចជាខ្សែភាពយន្ត នៅកម្ពុជាឱ្យមានភាពល្បីល្បាញ រីកចម្រើនទៅមុខបន្តទៀត។

ទន្ទឹមគ្នា នឹងម្ចាស់ផលិតកម្មមហាហង្សទទួលបានតួនាទី ជាអនុប្រធាននេះផងដែរ គឺមានលោក ឆាយ បូរ៉ា ចាងហ្វាងផលិតកម្មដើមត្នោត ដែលធ្លាប់ជាប់តំណែង ជាប្រធានសមាគមជាយូរមកហើយ គឺត្រូវបានប្រកាសទទួលស្គាល់ជាប្រធានម្ដងទៀត ស្របគ្នាដែលលោក សែម វិសាល ម្ចាស់ផលិតកម្ម Wonderfilm Cambodia ត្រូវបានលិខិតទទួលស្គាល់ជាអគ្គលេខា និងលោក ឡូវ មីលឡង់ និងលោក ព្រំ សិលា ត្រូវប្រកាសទទួលស្គាល់ជាសមាជិក។

លោក អ៊ិន សុភិន អនុប្រធានសមាគមភាពយន្តកម្ពុជា ក្នុងអាណត្តិថ្មី បានថ្លែងក្នុងកិច្ចសម្ភាសន៍ ជាមួយក្រុមការងារ Khmer Talking តាមទូរស័ព្ទថា «នេះជាលើកទី១ ដែលលោកទទួលបានសំឡេងបោះឆ្នោះ ឱ្យធ្វើជាអនុប្រធានសមាគមមួយដ៏ធំ ដោយការជ្រើសរើស បានថ្នាក់ដឹកនាំនៅក្នុងអណត្តិនេះ ក៏មានការបែងចែកនូវលក្ខន្តិកៈ និងការងារច្បាស់លាស់ សម្រាប់ថ្នាក់ដឹកនាំទាំង៥»។ លោកបន្តថា «ក្នុងនាមជាអនុប្រធាន លោកនឹងប្រើឱ្យអស់សមត្ថភាព បំពេញការងារសមាគម ដើម្បីឱ្យវិស័យភាពយន្តកម្ពុជា ទទួលបានការរីកចម្រើន ទាំងក្នុងស្រុក និងក្រៅស្រុក ខណៈក្នុងអាណត្តិថ្មីនេះ លោកមិនទាន់ដឹងថា នឹងអាចរួមចំណែកនៅក្នុងសមាគមនេះ បានដល់កម្រិតណានោះទេ ប៉ុន្តែអ្វីដែលលោកបានធ្វើ គឺបានស្វែងរកដៃគូមកផលិតកុនឱ្យកាន់តែមានគុណភាព និងមានការទទួលស្គាល់ទ្វេរដង ដោយមិនខ្វល់ពីការបោះទុនក្នុងចំនួនច្រើនជាងមុន។ ជាមួយគ្នានេះ លោកមានការតែរួមដៃ និងឆន្ទៈប៉ុណ្ណោះ ទើបអាចធ្វើឱ្យវិស័យភាពយន្ត នៅកម្ពុជាមានការរីកចម្រើនទៅបាន»។

សូមជម្រាបថា ប្រធាន និងថ្នាក់ដឹកនាំសមាគមភាពយន្តកម្ពុជាទាំង ៥រូប ដែលបានទទួលស្គាល់ជាផ្លូវការដោយក្រសួងមហាផ្ទៃ គឺសុទ្ធតែមានឆន្ទៈ ក្នុងការពង្រឹងគុណភាពវិស័យភាពយន្ត ដើម្បីឱ្យកាន់តែទទួលស្គាល់នៅក្នុងស្រទាប់អ្នកគាំទ្រទាំងក្នុង និងក្រៅស្រុក ខណៈការប្រកាសផ្លូវការនៃថ្នាក់ដឹកនាំរបស់ សមាគមនេះ គឺធ្វើឡើងតាមរយៈការបោះឆ្នោត របស់សមាគមអស់ជាច្រើនខែមកហើយនោះ ដោយក្រោយការសម្រេចជ្រើសបានប្រធាន និងសមាជិកទាំង៥ ដែលទើបបទទួលស្គាល់ដោយក្រសួងមហាផ្ទៃ៕