ឃាត់ខ្លួន ជនជាតិវៀតណាមប្រុស-ស្រី២២នាក់ទៀតហើយ លួចឆ្លងដែន និងកំពុងស្នាក់នៅធ្វើការងារខុសច្បាប់
ភ្នំពេញ ៖ ជនជាតិវៀតណាមប្រុស-ស្រីចំនួន២២នាក់ដែលលួចឆ្លងដែន និងកំពុងស្នាក់នៅធ្វើការងារខុសច្បាប់ត្រូវកម្លាំងនគរបាលឃាត់ខ្លួនបញ្ជូនទៅអគ្គនាយកដ្ឋានអន្តោប្រវេសន៍។នៅថ្ងៃទី១៨ ខែមេសា ឆ្នាំ២០១៨ វេលាម៉ោង ០៩ព្រឹក កម្លាំងការិយាល័យស៊ើបអង្កេតនិងអនុវត្តនីតិវិធី នៃស្នងការដ្ឋាននគរបាលរាជធានីភ្នំពេញ ដឹកនាំដោយ លោកអនុសេនីយ៍ឯក វង្ស ខេមរា ជានាយរងការិយាល័យ បានចុះសហការជាមួយនាយកដ្ឋានស៊ើបអង្កេត និងអនុវត្តនីតិវិធីនៃអគ្គនាយកដ្ឋានអន្តោប្រវេសន៍ និងកម្លាំងសមត្ថកិច្ចមូលដ្ឋានខណ្ឌឫស្សីកែវ សម្របសម្រួលផ្លូវច្បាប់ដោយលោក សៀង សុខ ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញនឹងលោក លឹម ស៊ាងហៃ ក្រឡាបញ្ជី ចុះត្រួតពិនិត្យ ជនជាតិវៀតណាម ដែលលួចឆ្លងដែន និងកំពុងស្នាក់នៅធ្វើការងារខុសច្បាប់ស្ថិតនៅហាងកាហ្វេ និងហាងម៉ាស្សា ចំនួន០៣ទីតាំង។
ជាលទ្ធផល ពិនិត្យឃើញមាន ជនជាតិវៀតណាម សរុបចំនួន២២នាក់ (ស្រី១២នាក់) ប្រើប្រាស់ឯកសារមិនត្រឹមត្រូវ។ ត្រូវបានឃាត់ខ្លួនបញ្ជូនទៅអគ្គនាយកដ្ឋានអន្តោប្រវេសន៍ដើម្បីអនុវត្តនីតិវិធីបន្តនៃច្បាប់។
ទីតាំងទី០១៖ សង្កាត់ស្រះចក ខណ្ឌដូនពេញ ឃាត់ខ្លួនជនជាតិវៀតណាម ចំនួន០៦នាក់ស្រី។
ទីតាំងទី០២៖ សង្កាត់ទួលសង្កែ១ ខណ្ឌឫស្សីកែវ ឃាត់ខ្លួនជនជាតិវៀតណាម ចំនួន០៧នាក់(ស្រី០៣នាក់)។ទីតាំងទី០៣៖ សង្កាត់ឫស្សីកែវ ខណ្ឌឬស្សីកែវ ឃាត់ខ្លួនជនជាតិវៀតណាម ចំនួន០៩នាក់ (ស្រី០៣នាក់)៕
Post a Comment