អស់លុយរាប់ម៉ឺនដុល្លារ ព្រោះចាញ់បោកចិនមួយក្រុម ប្រើល្បិចចងការប្រាក់ឲ្យពលរដ្ឋខ្មែរ (វីដេអូ)
ថ្មីៗនេះមានពលរដ្ឋខ្មែររងគ្រោះខ្លះបានបង្ហោះសារលើបណ្តាញសង្គមហ្វេសប៊ុក រឿងជនជាតិចិនបើកក្រុមហ៊ុនចងការ ដោយយកការប្រាក់ខ្ពស់លើសការកំណត់របស់រដ្ឋាភិបាល រហូតដល់ ១០ ដងឯណោះ។
ពាក់ព័ន្ធនឹងបញ្ហាលង់ខ្លួនដកលែងរួចចាញ់បោកការប្រាក់របស់ក្រុមចងការប្រាក់ជនជាតិនេះ ពលរដ្ឋដែលរងគ្រោះម្នាក់បានរៀបរាប់ថា ដំបូងឡើងអ្នកស្រីជំពាក់ក្រុមចងការប្រាក់របស់ចិននេះតែប្រហែល ២ ពាន់ដុល្លារទេ តែក្រោយមកក៏មានក្រុមចងការប្រាក់របស់ចិនបន្តបន្តាប់តេមកអ្នកស្រីណាត់ជួបកន្លែងស្ងាត់ហើយបញ្ចុះបញ្ចូលឲ្យខ្ចីលុយផ្តិតមេដៃ ទាំងសភាពហាក់បីដូចត្រូវថ្នាំឬចាញ់មនោគមន៍ ពីមួយទៅមួយរហូតលង់ខ្លួនអស់ប្រាក់ជិត ១០ ម៉ឺនដុល្លារ។
ជនរងគ្រោះរូបនេះបានរៀបរាប់សារតាមរយៈវីដេអូយ៉ាងវែងអន្លាយមានខ្លឹមសារដាស់សឿនដូច្នេះថា «សូមបងប្អូនប្រុងប្រយ័ត្នចំពោះពួកផ្តល់កម្ចីទាំងឡាយណា ដែលគ្មានអាស័យដ្ឋាន គ្មានច្បាប់អនុញ្ញាតិ ដែលតែងដើរចែកកាតប្រហាក់ប្រហែលនឹងរូបភាពខាងក្រោម(កាតខាងក្រោម មិនទាន់លេចបញ្ហាមកទេ តែត្រូវប្រុងប្រយ័ត្ន)។ ដំបូងបុគ្គលិកស្រីប្រុសបីបួននាក់ ដើរចែកកាត និងសុំលេខទូរស័ព្ទយើង ហើយទាក់ទងសួរនាំរឿងខ្វះខាតលុយរកស៊ី រឿងចង់បង្វិលលុយបីបួនថ្ងៃរឺមួយអាទិត្យជាដើម។ដំបូងវាទៅជួបយើងផ្ទាល់ដើម្បីស្គាល់ស្ថានភាពយើង អាចនៅកន្លែងលក់ដូរ រឺផ្ទះយើងតែម្តង។ ក្រោយមកវាណាត់យើងជួបនៅហាងកាហ្វេណាដែលស្ងាត់ ហើយនិយាយរឿងផ្តល់កម្ចី ដោយអោយយកឯកសារផ្សេងៗមកជាមួយដូចជាសៀវភៅគ្រួសារ អត្តសញ្ញាណប័ណ្ណ ហើយការប្រាក់៥០ទៅ១០០% ពេលនោះយើងនឹងមិនព្រម ហើយវាអោយយើងចាំ វាខលហៅថៅកែវាជាជនជាតិគេ អាចចិន ឥណ្ឌា រឺជនជាតិផ្សេងៗ វាចូលមកជក់បារីបង្ហុយតែបន្តិច យើងបាត់ស្មារតី យល់ព្រមផ្តិតមេដៃទទួលកម្ចី និងកំណត់ថ្ងៃសងវិញ»។
ជនរងគ្រោះរូបនេះបញ្ជាក់ទៀតថា «បន្ទាប់មក វាចាប់ផ្តើមខលបន្លាច និងជំរិតទារប្រាក់ ហើយអោយបណ្តាញវា ទាក់ទងមកយើងផ្តល់កម្ចីដើម្បីយកទៅសងវាផ្តាច់ ដែលការណាត់ជួបគឺដូចមុន និងពង្វក់ស្មារតីយើងដូចលើកមុនដែរ រហូតដល់កម្ចីផ្តាច់មួយតមួយ ប្រាំទៅដប់ក្រុមហ៊ុន ដែលសុទ្ធតែជាបណ្តាញពួកវា។ ដូចករណីប្អូនស្រី ដែលផូសសុំការអន្តរគមន៍ពីសម្តេចតេជោនិងលោកជំទាវ គឺនាងយកប្រាក់កម្ចីត្រឹមតែ២០០០$ តែត្រូវវាពង្វក់រហូតដល់អស់ជិត១០ម៉ឺន$។ សូមប្រុងប្រយ័ត្ន កុំជួប កុំណាត់ កុំខ្ចី កុំពាក់ព័ន្ធនឹងពួកវាអោយសោះ ពិសេសពួកបណ្តាញជនជាតិខ្មែរដូចគ្នា ហេតុអីចូលដៃជើងនឹងពួកបោកជំរិត មកធ្វើបាបខ្មែរដូចគ្នាបែបនេះ»៕
Post a Comment