ឈាមស្រែកស្បែកហៅ! ចាប់បានឃាតកសម្លាប់ថៅកែបន្លាស់រថយន្តខេត្តសៀមរាប

សៀមរាប ៖ ឃាតករដែលបានសម្លាប់ថៅកែលក់គ្រឿងបន្លាស់រថយន្ត ប្លន់យកទ្រព្យសម្បត្តិ នៅថ្ងៃទី២៣ ខែមេសា ឆ្នាំ២០១៨នេះ ត្រូវកម្លាំងនគរបាលព្រហ្មទណ្ឌនៃស្នងការខេត្តចាប់បានហើយ នៅត្រង់ចំណុចរង្វង៉មូល ភូមិព្រៃគុយ ឃុំអំពិល ស្រុកប្រាសាទបាគង នៅល្ងាចថ្ងៃទី២៥ មេសា ២០១៨ ។

ប៉ូលិស បានអោយដឹងថា ជនសង្ស័យដែលចាប់ខ្លួនបាននេះ មានឈ្មោះ ព្រហ្ម សុព្រឹក្ស ហៅថាន អាយុ២៨ឆ្នាំ រស់នៅភូមិចាន់ស ឃុំចាន់ស ស្រុកសូទ្រនិគម ខេត្តសៀមរាប ។

ជនសង្ស័យរូបនេះ ត្រូវបានសមត្ថកិច្ចកំពុងសាកសួរ ហើយបន្តកសាងសុំណុំរឿងទៅតុលាការ ។

សូមបញ្ជាក់ថា ករណីឃាតកម្មមួយបានកើតឡើងដោយជនសង្ស័យ បានធ្វើសកម្មភាពចាក់សម្លាប់ជនរងគ្រោះជាថៅកែលក់គ្រឿងបន្លាស់រថយន្ត ដោយកាំបិតចុងស្រួចចំបំពង់កបណ្ដាលឲ្យស្លាប់ក្នុងថ្លុកឈាម រួចហើយក៏ប្រមូលយកទ្រព្យសម្បត្តិរួចគេចខ្លួនបាត់ ។

ករណីឃាតកម្មនេះបានកើតឡើងនៅវេលាម៉ោងប្រមាណជា៩យប់ថ្ងៃទី២៣ ខែមេសា ឆ្នាំ២០១៨ ស្ថិតនៅផ្ទះលក់គ្រឿងបន្លាស់រថយន្ដ (គ្មានផ្លាក់យីយោ) ស្ថិតនៅក្រុមទី៩ ភូមិគ្រួស សង្កាត់ស្វាយដង្គំ ក្រុងសៀមរាប ។ លុះនៅព្រឹកថ្ងៃទី២៤ ខែមេសា ឆ្នាំ២០១៨ មានគេប្រទះឃើញសព ទើបមានការភ្ញាក់ផ្អើលឡើង ។

សមត្ថកិច្ចនៅកន្លែងកើតហេតុបានឲ្យដឹងថា ជនរងគ្រោះឈ្មោះ ពិត បារាំង ភេទប្រុស អាយុ៤៩ឆ្នាំ មុខរបរលក់គ្រឿងបន្លាស់រថយន្ត ។

សមត្ថកិច្ចបានឲ្យដឹងថា ទ្រព្យសម្បត្តិ ដែលបាត់បង់មិនទាន់ដឹង ព្រោះជនរងគ្រោះស្នាក់នៅម្នាក់ឯង ។ ករណីនេះជនល្មើស បានដោះយកកាមេរ៉ាសុវត្ថិភាព រួចគេចខ្លួនបាត់ ។ រហូតដល់ល្ងាចថ្ងៃទី២៥ មេសា ២០១៨ទើបសមត្ថកិច្ចនគរបាលព្រហ្មទណ្ឌនៃស្នងការខេត្តចាប់បាន ៕