ក្ដៅៗ! ដឹងការពិតរឿងចោរជិត៣០ទូកកាត់ស្ពានបាឡេដែក ទើបសម្ពោធហើយ
ភ្នំពេញ ៖ លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូន រាជធានីភ្នំពេញ បានឲ្យដឹងនៅព្រឹកថ្ងៃទី០៩ ឧសភា ២០១៨ នេះថា ការពិតមិនមែនចោរលួចកាត់ស្ពានបេឡេទេ ក្រុមនេះបានមកមុជទឹក ចូលទៅយកកំណាត់កម្ទេចដែក ដែលសេសសល់ ធ្លាក់ក្នុងទឹក ។ ទោះជាយ៉ាងណា សមត្ថកិច្ច បាននិងកំពុងធ្វើការងារនេះហើយ ។ លោកបានសង្កត់ធ្ងន់ថា ចំពោះស្ថាភាពស្ពាន និងគុណភាពស្ពាន នៅល្អដដែលទេ ។ មិនប៉ះពាល់អ្វីឡើយ។ ការចរាចរណ៍បានជាធម្មតាទេ ។
បើយោងប្រភពពី រដ្ឋបាលរាជធានីភ្នំពេញវិញ បានអះអាងថា ដោយទទួលបានព័ត៌មានពីករណីលួចកាត់យកដែកនៅក្រោមស្ពានបេឡេឫស្សីកែវ នៅព្រឹកថ្ងៃទី៩ ខែឧសភា ឆ្នាំ២០១៨នេះ ក្រុមវិស្វករមន្ទីរសាធារណការ និងដឹកជញ្ជូនរាជធានីភ្នំពេញ និងវិស្វករការដ្ឋានរបស់ក្រុមហ៊ុន OCIC បានចុះពិនិត្យតួស្ពាននៅទីតាំងកន្លែងកើតហេតុ ឃើញថា មានករណីប្រជាពលរដ្ឋជិះទូក មកយកដែកដែលសេសសល់ពីការសំអាតការដ្ឋាន និងដែកការពារសុវត្ថិភាពការដ្ឋានក្នុងពេលសាងសង់កន្លងមក ដែលការដ្ឋានកំពុងរុះរើសំអាតដឹកចេញ ។ ចំពោះដែកបេឡេតួស្ពានទាំងមូល គឺមិនមានការបាត់បង់ ឬប៉ះពាល់ដល់គ្រោងដែកសំណង់ស្ពានឡើយ ។អាស្រ័យហេតុនេះ សូមបងប្អូនប្រជាពលរដ្ឋជ្រាប និងសូមអញ្ជើញធ្វើចរាចរឆ្លងកាត់ជាធម្មតា ។
ការបញ្ជាក់ ខាងលើនេះ បានធ្វើឡើង បន្ទាប់ពីកាលពីទៀបភ្លឺ ថ្ងៃទី០៩ ខែឧសភា ឆ្នាំ២០១៨ សមត្ថកិច្ចខណ្ឌជ្រោយចង្វារ បានឃាត់ខ្លួនបុរសជនសង្ស័យចំនួន០៤នាក់ នៅចំណុចស្ពានបាឡេ ដែលស្ថិតនៅចំណុចឃ្លាំងសាំងឬស្សីកែវ ។ ជនសង្ស័យទាំង៤នាក់ រួមទាំងវត្ថុតាង ត្រូវបានបញ្ជូនទៅអធិការដ្ឋាននគរបាលខណ្ឌជ្រោយចង្វារ ដើម្បីសាកសួរ ។
Post a Comment